Kosova e ngrirë, Shqipëria e pavendosur: Xhymshiti në Ora News

Vudi Xhymshiti paralajmëroi në Ora News se ngërçi politik po e dobëson Kosovën, ndërsa Shqipëria rrezikon besueshmërinë duke qëndruar mes Prishtinës dhe Beogradit.

Tiranë — Kryeredaktori i Gunpowder Chronicles/Kronikat e Barutit, Vudi Xhymshiti, ishte i ftuar sonte në edicionin qendror të lajmeve në televizionin kombëtar Ora News, ku analizoi krizën institucionale në Kosovë, pasojat e saj ekonomike e rajonale, si dhe pozicionet e aktorëve politikë vendas dhe ndërkombëtarë.

Në intervistë, Xhymshiti tha se vendimi i Gjykatës Kushtetuese për të pezulluar punimet e Kuvendit të Kosovës deri më 30 shtator është “një shenjë e dobësisë institucionale dhe e mungesës së përgjegjësisë kolektive”. Ai theksoi se përgjegjësia nuk i takon vetëm Listës Serbe, e cila sipas tij “po vepron me qëllim për ta mbajtur Kosovën nën ndikimin e Beogradit, deri në ekstrem me rastin e sulmit të armatosur në Banjë”, por edhe opozitës kosovare, që shpesh “e ka përdorur bllokadën si instrument për përfitime të brendshme politike”.

Duke folur për dimensionin ekonomik e ndërkombëtar, Xhymshiti paralajmëroi se pavarësisht parashikimeve për rritje ekonomike mbi 3.5 për qind, “mungesa e institucioneve funksionale rrit pasigurinë për investime dhe dëmton kredibilitetin e Kosovës në BE”. Ai shtoi se mesazhi që po dërgohet ndërkombëtarisht është “dobësi në një kohë kur stabiliteti është jetik përballë tensioneve rajonale”.

Në një moment të veçantë të bisedës, Xhymshiti vuri në dyshim edhe efektivitetin e marrëveshjes trepalëshe të nënshkruar nga Kosova, Shqipëria dhe Kroacia për një aleancë të përbashkët ushtarake në rast agresioni nga Serbia.

“Është e vështirë të besohet se Shqipëria do të angazhohet realisht, duke marrë parasysh qëndrimet zyrtare të qeverisë shqiptare. Politika e Tiranës, sidomos nën drejtimin e kryeministrit Edi Rama, ka qenë shpesh më afër Beogradit se Prishtinës,” tha ai, duke kujtuar se gjatë agresionit serb në veri të Kosovës më 2023, Tirana zyrtare i kërkoi palës kosovare de-eskalim në vend se ta emërtonte Serbinë si agresore dhe t’i dilte në ndihmë Prishtinës për ta shpartalluar operacionin paraushtarak të Serbisë për agresion ndaj Kosovës.

Sipas tij, Shqipëria duhet të bëjë një distancim të hapur nga Beogradi për të qenë e besueshme si partnere e Kosovës: “Vetëm duke kushtëzuar Serbinë me njohjen e Kosovës dhe duke adresuar përgjegjësinë e saj historike, Shqipëria mund të shihet si aktor i përgjegjshëm dhe i besueshëm.”

Në mbyllje, Xhymshiti theksoi se është “përgjegjësi kushtetuese e shtetit shqiptar të veprojë në interes të shqiptarëve në rajon, duke mbështetur hapur sovranitetin dhe integritetin territorial të Republikës së Kosovës”.